Sang Lam na ding Vai ki kup na

Mun tuamtuam a om Tungzang suan thempeuh, Zanlam a sanggampa Khen Muan hong pulak thu khat tawh kizomin Tungzang sang lam thak ding vai tawm hong kikup pih nuam ing. Omna ciat ah Pasianin hong kem in mapaina hong pia ciat ta hen. Hih tan giat or tan sawm sang lam nading tawh ki zomin lunggulh hang cih mawk bek hilo in tangthu leh tu nai a thu piangte ngaihsun kak a, geel theih ding thu tampi om kha ding hi. Hun ngah kimin thu kiza tuah thei hi leng ei sanga tangthu a theizaw tampi om kha thei ding hi. Ahi zongin tuate phonglo kikkik lehang nuam a salo zong pawl khat om kha thei ding ahih manin tuate cillum tawh valh in mailam nawt ding khan toh vai zaw in ka um hi. Bangbang ahi zongin a huamkim a ih theih pak dingin tawm khat kong gen masa nuam hi. Nidang hunlai pek pan kipanin Tungzang khuami te pen na khat peuhpeuh ah a ki thukhat baih mahmahte hi hang. Ahi zongin ih thanemna ah ih makaite hong makaihna tungtawnin ih khan toh ding zahin ki khangto theilo hong suak a, tudong ih khua veng ih khua pam te sangin a mimal in ki tamzaw napi Tan li (Primary school) ciang bek tawh omlai lawmlawm hihang. Zong zumhuai phial mai cih ding hi. Mipil a ih neih ih muan sunsunte in zong a muhna( vision) pen tan li ciang level ding mahin ngaihsunin na khempeuh geel mawk uh hi. A beisa ah bangthu bangthu piang hita leh a tha ngah huai khat ah Pasianin Dim mawl Dim hai ci a, mi hong kote mah hi ta leng tu hun ciangin lampi tuamtuam tawh Pasian in gamdang hong puak tek a, Tungzang khua a puah zo tham dingin nang leh kei hong koih khinta ahih lam phawk a, khanlawh hunta hi. Hih bang thu leh vai liante pen mihing khat leh nih bek vai hawmna tawh hamsa ding ahih manin mun tuamtuam a om Tungzang khangnote hanciamna tawh a piang lah ding bangmah om lo hi. Lunggulh hi peuh leng innkuan khat nangawnin inn lianpi lam zo thei a, ih lunggulh zawh kei leh khuazang khat nangawnin inn khat a kilam zolo thei ahi hi. Tu in Tungzang sang naupang hi zahta sangkah lo a om cih pen ih tangthu sungah a hoihlo pen dinmun himawk lo a hiam? Hih bang hunte ah huh zo panpih zo dinga a kilawm Tungzang suante in don kei leh kua midangte hong pai in hong don mawk ding hiam? Eite zong hih bangin omom lehang ih theih loh kalin hun hong beipak dinga, ih khua ih tui puah manlo in a kipaisan ding hilel hi. Mi thupi ih cihte pen cikmah hun a, a nu leh a pa, a pi a pu, a u a naute, a mah a pantahte, a pianna a khua a tui leh a gam, a pianpih pau a mang ngilh ngeilote ahi hi. Tua bek thamlo in ama hih zawh thu a hih nak leh tuate khempeuh huh dinga kiging dente ahi hi. Hih thu tawh kizom a, a lunggulhte in ih omna ciat panin ih ngaihsutba ciat sung khawm dingin kong zawn thuah lai uh hi. Pasianin na lunggulhna hong thupi sim tahen.Thupuak,Mang Khan KhupTungzang SuanCanada.